دخل بو غترة القهوة على غير عادته رابط الثوب ورافع الصروال وهو يسب ويلعن وهنا لم يمسك بوكشمه نفسه من الضحك ولم يفوت الفرصة قائلاً "ها بومحمد شكلك اشتغلت في السوق المركزي" ورد بو غتره بحنق "الناس غرقانه وبوكشمة يطنز، إطلع من القهوه وشوف صارت الديره بحيرات وأنهار وفاضت البواليع ودخلت المياهه البيوت وخربت أثاثها والسيارات تكسرت من المطبات والحفر وراح حلال الناس موفت" ورد بو كشمه وهو يدارى ضحكته بخبث " شتبينى أسوي يعنى لا أقدر أوقف المطر ولا أنا مسئول عن الشوارع والمجاري، مو ربعك المسئولين اللي كل مره يقولون أكملنا الاستعدات لاستقبال الشتاء".

وهنا زادت عصبية بوغتره "إنت غشيم لو تتغيشم هذه ديرتنا كله كلام في كلام شاطرين بس للتصريحات والتصوير، بس فعل ما في، شغل خرطي وضمير ماكو وكل مره يطيح إشوية مطر ينكشف المستور، لا تصريف أمطار عدل ولا مجاري عدله ولا شوارع نفس الناس، نبي نعرف وين تروح الملايين المصروفه على المشاريع، والقهر بعد بياخذوا ضريبه! ليش؟ ما شبعوأ لهف وشفط ".

وهنا واصل بوكشمه استفزازه "بو محمد حاسب شكلك صرت معارضه" وفعلاً نجحت الخطة واستفز بوغترة قائلاً "شوف لا تطلعني من طوري تره بسب الأولى والتالي، الوضع اللي شفته بعيوني يخلى حتى الصخر يصيح والكبارية ما يهمهم قاعدين في قصورهم وكل واحد منهم بدل القصر الواحد عنده عشرة في البحرين وبره البحرين".

ولكن بو كشمه لم يكتف "شكلنا بننحبس تره أنا ما أعرفك إذا صادوك ما فيني شدة كيابل وضرب ورفس، إضلوعى للحين ما تصلحت من أيام سجن جزيرة جدا الله لا يعيدها من أيام" وهذا ما زاد حنق بوغتره" للصبر حدود ولد عمي، سكتنا مره ومرتين وبلعنا المر وإذا ما تكلمت ويه ربعى في القهوه وانفس إشويه بنجلط". وهنا هدأ أيضا بوكشمه ولتغيير الموضوع سأله مستفسراً "بومحمد ماشفنا اسمك ولا صورتك في قوائم المرشحين لا يكون كنت من المعارضة سابقا وشطبوا اسمك ههه".

وهنا جلس بوغتره وقال "جان زين ههه بصراحة بعد إللي شفته وسمعته هونت ما ريد لا برلمان ولا شورى ولا مسئوليه، كل البحرينيين من المحرق لستره إلى البديع والمالكية والرفاع تشكي لربها وتدعي من قلبها على كل المسئولين والبرلمانين والبلديين الكذابين والله ما يضيع دعوة المضلوم والمقهور، وأنا رجال ما أريد أظلم أحد وبعدين يدعي علي بزوال الصحة والرزق والحلال والبنين وبعذاب الآخرة فقلت في نفسي أنعل أبوها من أربعة لو خمسة آلاف دينار مالت البرلمان" وهنا هون أبو كشمه على صاحبه "يا بو محمد إنت رجال طيب وقلبك نقى لذا يهمك حال الناس أما اللي بالي بالك لهم يوم في الدنيا وحساب عسير في الآخرة وإنت اليوم لك شاي كرك وصحن نخج على حسابي".

* "بوكشمة" رجال عادي وبسيط، عقله حصيف وقلبه نظيف وضميره عفيف، يشعر بالغصة وتخنقه العبره لما آل إليه حال بلاد المليون نخلة.